Venerabilibus viris et religiosis O., priori Cluniacensi, et ejusdem loci conventui, frater P., humilis prior Voltæ, et ejusdem loci conventus, salutem et tam debitam quam devotam in omnibus hobedientiam. Religioni vestræ dignum duximus intimandum, quod cum juxta statuta generalis capituli Cluniacensis diligenter et modo debito monuissemus in privato et in publico J. de Lorsac, monachum nostrum, quod proprium suum nobis restitueret, et cum ad debitam ammonitionem nostram hoc facere nollet, juxta diffinitorum Cluniacensium mandatum ipsum excommunicatum denuntiassemus, ipse ad audientiam domini abbatis, assignans diem in quindena Omnium Sanctorum, nescimus quo ductus spiritu, appellavit, et claustrum nostrum in tanto murmure posuit, quod in obprobrium Dei et Cluniacensis ecclesiæ vertebatur. Quod cum sustinere co[m]mode non possemus, in quodam prioratu nostro ipsi sufficienter victum assignavimus et vestitum; quæ ipse incontinenti distraxit, et vadit vagabundus per orbem in obprobrium Dei et nostrum et ecclesiæ universæ. Et ante omnia ista duas domos nostras, quas ei commendaveramus, adeo distraxerat, quod nullus monachus ibi residentiam potest facere. Hæc et multa alia mala nobis fecit, quæ per dilectum fratrem nostrum J., latorem præsentium, quem ob hoc specialiter vobis mittimus, scire poteritis, supplicantes vobis quod super dicto negocio taliter ordinetis, ut Deo et vobis et Cluniacensi ecclesiæ cedat ad gloriam et honorem.